Maahmaaho on Kapchits.Online

Wareysigii ay mareegtada WardheerNews la yeelatay Dr. Georgi Kapchits

Wed, 25 Jan 2006 00:00:00 +0000

Waxaa lagu daabacay mareegtada WardheerNews.com, 25 Janaayo 2006. Wareysigii waxaa qaaday Isamail A. Hassan (Khaliil). Qoraalku waa mid taariikhi ah oo halkan loogu keenay in la kaydiyo; xuquuqda qoraalka waxaa iska leh mareegtada daabacday.

Dr. Kapchits: Gacaliye Khaliil waad mahadsantahay. Waxaa jirta maahmaah tidhaahda ‘waayeel afkaaga fur, ilkahaaga aan tiriyee lama yidhaahdo’. Kaftan weeye, nin furfuran baan ahaye.

Hordhac

Waraysi xiiso badan oo ay WardheerNews la yeelatay aqoonyahanka Ruushka ah ee Dr. Georgi Kapchits oo hadda booqasho ku jooga wadanka Jarmalka.

Ururka Aabbayaasha Soomaaliyeed ee Ottawa iyo booqashadii Dr. Georgi Kapchits

Sat, 09 Aug 2003 00:00:00 +0000

Ururka Aabbayaasha Soomaaliyeed ee Ottawa (Kanada), wuxuu in dhoweydba ku foognaa baadhitaanno dhawr ah oo uu ka mid ahaa sidii loo ogaan lahaa loona maarayn lahaa waxa keenay (ama abuuray) kala qaaraanka ku dhacay qoysas badan oo Soomaaliyeed, qaar kalana ay halis ugu jiraan.

Baadhitaankaasi waxa lagu ogaaday jiritaanka xidhiidh la’aanta ka dhex aloosan walcanka iyo ubadkooda, taasi oo keentay iney dhalliyaro badani ka tasoobaan qoysaskoodii. Si tabaalooyinkaa loo maareeyo, kuwa soo foollena looga feejignaado oo looga hortago wuxu ururku qabanqaabiyey aqoon-isweydaarsiyo dhawr ah oo loogu talagalay sidii dhalinta loogu soo dabbaali lahaa barashada Af-soomaaliga. Waxa kale oo aqoon-isweydaarsigaasi ka dhalatay oo laysla af-gartay in la soo martiqaado Dr. Georgi Kapchits oo u dhashay dalka Ruushka ahna aqoonyahan ku xeel dheer afka iyo dhaqanka Soomaaliyeed, kana dhiga af-soomaaliga Jaamacadda Moosko ee dalka Ruushka iyo Jaamacadda Berlin ee dalka Jarmalka, si uu u xaradhaamiyo dhalinyaro badan oo hadda ka maagaysa ama aan iskuba lurin, barashada afka hooyo.

Hal-Aqoon oo wareysi la yeeshay Dr. Georgi Kapchits

Tue, 01 Jan 2002 00:00:00 +0000

Waxaa lagu daabacay ‘Hal-Aqoon’, Xidhmada 2aad, tirsiga 1aad, 2002.

Hal-aqoon: Dr. Georgi, ugu horrayn waxaan jeclaan lahaa inaad warbixin kooban naga siisid mahadhadaada?

Georgi: Haddii la soo koobo, waxaan ku dhashay Midowga Soofiyeeti gu’gu kolkuu ahaa 1939kii. Intii u dhexeysay 1967kii iyo 1994kii waxaan ka shaqeeyey Laanta af-Soomaaliga ee Raadiyow Moosko. Kaddib markii la xiray Qaybtii Afrika ayaa waxaan u gudbay Qaybta wararka oo aan faalleeye ka ahay. Mararka qaarkood waxaan af-Soomaaliga ka dhigaa Jaamacadda Moosko iyo Jaamacadaha ka furan Berliin. Xaas wanaagsan baan leeyahay. Waxay ii dhashay laba gabdhood. Waxaan kaloo leeyahay laba gabdhood oo ay sii dhaleen (aan awow u ahay). Ninkii seexdaa saciis dibi dhalay!